Arrestohet vëllai i viktimës, policia e ndaloi të shkonte te kufoma e motrës

arrestohet-vellai-i-viktimes,-policia-e-ndaloi-te-shkonte-te-kufoma-e-motres

Katër persona janë arrestuar të shtunën mbrëma, në vendin ku ndodhi një vrasje e dyfishtë në fshatin Vitomiricë të Pejës. Të dyshuarit e arrestuar kishin sulmuar zyrtarët policorë në vendngjarje

Express mëson se njëri nga të arrestuarit dyshohet të jetë vëllai i viktimës, vajzës 17-vjeçare.

“Zyrtarët policorë janë sulmuar nga familjarët, njëri prej tyre dyshohet se ka qenë vëllai i viktimës, vajzës 17-vjeçare. Kanë dashur të hyjnë në vendin e ngjarjes, policia nuk i ka lejuar, policia ka ndërhyrë, më pas të dyshuarit i kanë sulmuar zyrtarët policorë”, kanë thënë për Express nga policia e Pejës.

Rastin për Express e kanë konfirmuar nga Policia dhe Prokuroria e Pejës.

“Janë kojshi, burri është 58 vjeçar ndërkaq viktima tjetër është një vajzë 17 vjeç. Motivet nuk dihen ende, rasti është duke u hetuar”, ka thënë për Express Fadil Gashi, zëdhënës i policisë së Pejës.

Shkodran Nikçi, zëdhënës i prokurorisë Themelore në Pejë, ka treguar se trupat e pajetë janë dërguar për obduksion në Institutin e Mjekësisë Ligjore në Prishtinë.

“Prokurori i Departamentit të Krimeve të Rënda të Prokurorisë Themelore të  Pejës ka dalë në vendin e ngjarjes, me urdhër të prokurorit të shtetit trupat e pajetë janë dërguar në IML për obdukim, gjithashtu janë dërguar edhe arma dhe gëzhojat për ekzaminim. Dyshimet e para janë se fillimisht është kryer vrasja e më pas vetëvrasja”, ka thënë Nikçi.